Shaayad baahar ki taraf se,
thodi dhool jaroor jamaa hai,
Fir bhi,
Yahin se pade-pade dekha jaa sakta hai...
dekha jaa sakta hai,
Oos paar ka nazaara...
Kal raat,
ek-tak dekhta rahaa,
Main woh bina parde ki khidkiyaan...
Sochtaa thaa,
Kahin youn aasman pe latakte,
taare bhi kabhie chootne lage hain...

Taara to nahi toota, par
Jaane kab ek raushni andar utar aayi...
Bas aur nahi leta,
Bistar chorh main uth baithaa...
Uthkar darwaja khola,
Failaaye donon haath,
Angadaayi ke saath,
Pichwaade padi oos kursi par jam gayaa..
Jam gayaa?
Ya youn kahiye, kahin tham gayaa...
Dheere dheere ujaale ke saath,
wahi andhera failtaa gayaa...
Har roz ki tarah,
kisi purani film ke jaise,
Sab kuch aankhon ke saamne tairataa gayaa,
Har woh manzar, har pal, har labz, har shaqs...

Pataa nahi,
Yaadein tagadi hoti jaa rahi hain,
Ya yaad-daasht kamjor...
Halki gahri soch me kahun,
Pradosh -poonam ki raat hogi,
Haan yahi kuchh chand roz pahle ki baat hogi...
Yeh yahaan,
darwaaje ke paas pade,
yeh dhaardaar-patle kaartoos,
Sab saaf de hi rahe hain gawaahi,
Ke uljhanon me ulajhane se,
mujhse hui thi woh laaparwahaahi...
Daftar se laut kar,
Ab binaa chaabi ke taale,
Der raat tootne lage hain....

Kursi chorh main waapas lautataa hoon,
Bikhre kaagzaat,
Failee kitaabein,
Titar-bitar kapde,
Idhar udhar failaa saamaan,
Kamre ko dekhtaa hoon,
to sochtaa hoon,
Bahut ho chuka,
Bas karna chahiye,
Mujhe ab chalna chahiye...
Mujh par ehsaan kar kar ke,
Khud yeh kamraa,
kitna mailaa aur bhaari ho gayaa hai...
Mujhse jyaada shaayad kisi aur ko iski zaroorat ho,
Ise bhi shaayad mujhse jyaada kisi aur ki zaroorat ho...
Kaun aayega yahaan mere baad?
Koyi aayega bhi?
Ya yeh bhi oos puraane makaan ki tarah...
khair tab bhi,
ise badalnaa hoga...
tootkar bhi fir naye saanche me dhalnaa hogaa...

Dekho roop badalne lage hain,
Deewaron pe naye rang chadne lage hain,
Baahar na taake,
Koyi aasman na jhaake,
Puraani khidkyion pe,
Naye parde lagne lage hain...

------------------------------------------------------------------

-16/10/2006.

 

 

Khadaa hoon main oos ghaat par,
Jahaan ke paani me shabd bahte hain...
Bolte shabd,
Chahakte shabd,
Theharte shabd,
Machalte shabd,
Inn me paanv duubo doon,
Yaa apne paanv dho loon?
Haath se chhoo loon,
Yaa inhe haath me bhar loon?
Ghoont ghhoont kar pee jaaun,
Yaa doob kar inme nahaa jaaun?

Khadaa hoon main oos baat par,
Jahaan shabdon me paani bahtaa hai...
Saath nahi hain shabd,
Par bulaa rahe hain shabd...
Khud ko mitaa ke bah jaaun
Yaa uthaa kar inhe sar se lagaa jaaun
Chhubh rahe hain shabd,
Badal rahe hain shabd...
Bah rahaa hai paani,
Yaa shaayad,
bah rahe hain shabd...

 

 

Main apne hi jeevan ka pighla suraj hoon,
Jo apne yash ki kirti nigalkar bhasm ho chalaa...
Main apne hi udram se jhatka nirjhar hoon,
Jo apne kad ke bhay se mitkar boon ho chalaa...
Main umeedon ka sindhu, doobta utarta sa,
Jo apne thatt ki paridhi khojta lupt ho chalaa...
Main sneh ka pyaasa bhhikshuk, aatur, paagal,
Jo apna bhavuk tark choos kar toonth ho chalaa...
Main apne hi bojhil falkon pe indradhanush sa,
Jo apne rang ki chakaachaundh se noor kho chalaa...
Main apne hi aankhon ka aansu, bahaa alaga sa,
Jo apni hi nazaron se gir kar bhool ho chalaa...
Main apni risati kalam se chhoota shabd anokha,
Jo pannon me fans kar jeevan bhar qaid ho chalaa...
Main apne hi saahas ka udtaa murkh patangaa,
Jo antaraagni me jal kar pal me chhar ho chalaa....
Main?
Main apne hi jeevan ka pighla suraj hoon,
Main shabd hoon....!

-------------------------

Title is same and same is the poetry, I reframed the last three lines without his permission, however author can be reached here.  I dont know if you would ever be here, great piece though. Keep writing. :)