Kaisa yeh manzar,
Kaisi yeh dagar hai...
Mere aaspas khadaa meraa akelaapan,
Khud mujhe kisi apraadh ka doshi maantaa hai...
Dinon-din uljhanon me uljhaa jaa rahaa hoon,
Apne aap se jaise lade jaa rahaa hoon...
Aankhen kosti hain, dil rota hai...
Par inkaa kaaran koi bhi nahi jaanta hai..

Kabhie kabhie kisi kone me,
aksar ek aawaz bhi uthti hai...
jo hamdard hokar bhi, 
kaanon me jaise chubhti hai....

"Yeh sab kuchh laazmi hai...
Iss duniya me akelaa,
haan akelaa har aadmi hai...
To fir kyun ?
Kyun apne aap se iss kadar ladoon main..."

Yeh saaraa jahaan kaanch kaa hai,
Aur fir kaanch ki parchhaiyon ka,
swayam koi astitva bhi nahi hota...
Satya dikhaayi de na de,
Par jo dikhaayi de,
Woh hameshaa satya bhi nahi hotaa...
To kyun issi bharam me fir apne aap ko dhakeloon main,
Kyun fir iss duniya ke kisi dikhaave me padun main...
Kyun na sab kuchh,
Apnaa sab kuchh hamesha ke liye chhorh doon main...